510. நான்காவது நாளாக உண்ணாவிரதம்: திருமா மயக்கம்

திருமா ஒன்றைப் புரிந்து கொள்ள வேண்டும். அவரைப் போன்ற (ஈழத்தமிழர் பால்) உண்மையான அக்கறை உள்ள அரசியல்வாதிகள் தமிழகத்தில் மிக மிகச் சிலரே. ஆனால், ஏதாவது உருப்படியாக செய்யக்கூடிய சூழ்நிலையில் உள்ளவர்களே ஒன்றும் செய்யாமல் அமுக்கமாக இருக்கும்போது, திருமா இப்படி உடல்நலத்தைக் கெடுத்துக் கொண்டு போராட்டத்தில் ஈடுபடுதல் வேண்டாம். உண்ணாவிரதத்தை தற்போடது கைவிடுதலே நல்லது. திருமா தன் போராட்டத்தை வேறு விதங்களில் தொடரலாம். உண்மையான நோக்கத்தோடு நடைபெற்ற, குறிப்பிடத்தக்க விழிப்புணர்வை ஏற்படுத்திய போராட்டம் இது தான்! மற்ற போராட்டங்கள், பெரும்பாலும் தமாஷாக்கள் தான் என்பதை அனைவரும் அறிவர்.
************************************

சென்னை: இலங்கையில் போரை நிறுத்தக் கோரி 4வது நாளாக உண்ணாவிரதம் இருந்து வரும் விடுதலை சிறுத்தைகள் கட்சி தலைவர் தொல். திருமாவளவனுக்கு இன்று மயக்கம் ஏற்பட்டது.

கடந்த 15ம் தேதி சாகும் வரை உண்ணாவிரதம் தொடங்கிய அவர் வெறும் தண்ணீர் மட்டுமே அருந்தி வருகிறார்.

இன்று காலை அவர் மிகவும் சோர்வுடன் மயங்கிய நிலையில் காணப்பட்டார். பேண்ட், சட்டை உடையிலிருந்து லுங்கிக்கு மாறியிருந்த அவர் நாற்காலியில் துவண்டு போய் காணப்படுகிறார்.

அவரது உடலை டாக்டர்கள் அவ்வப்போது பரிசோதனை செய்து வருகின்றனர். ரத்த அழுத்தம் குறைவாக உள்ளதாக டாக்டர்கள் தெரிவித்துள்ளனர்.

ரத்தத்தில் சர்க்கரை அளவு குறைந்து போய்விட்டதால் அவருக்கு மயக்கம், தலை சுற்றல் ஏற்பட்டு வருகிறது. வெறும் தண்ணீர் மட்டுமே அருந்துவதால் வயிற்று புரட்டலும் ஏற்பட்டு வருவதாக டாக்டர்கள் தெரிவி்த்தனர்.

திருமாவளவனின் தாயார் பெரியம்மா, தம்பி செங்குட்டுவன் ஆகியோர் அவர் அருகிலேயே இருந்து கவனித்து வருகின்றனர்.

இந் நிலையில் இன்று காலை விடுதலை சிறுத்தைகள் கட்சியின் அரசியல் நிர்வாகக் குழுக் கூட்டம் உண்ணாவிரத பந்தல் அருகே நடக்கிறது. இதில் பங்கேற்க மாநில, மாவட்ட நிர்வாகிகள் குவிந்துள்ளனர்.

உண்ணாவிரதத்தை திருமாவளவன் கைவிடுவாரா என்பது பற்றி இந்தக் கூட்டத்தில் முடிவெடுக்கப்படுகிறது.